આરોપી રોહીત સોલંકી ઉર્ફે અરહાન શેટ્ટી કરોડોના ફલેટમાં રહે છે : ઓડી રાખે છે તેમજ ચોરી કરવા અન્ય રાજ્યમાં પ્લેનથી જતો
(વર્તમાન પ્રવાહ વાપી બ્યુરો)
વાપી, તા.04: વલસાડ એલ.સી.બી.એ વાપી સહિત ત્રણ રાજ્યોમાં ચોરી કરેલ તેમજ લક્ઝરીયસ જીવન જીવતા સાતીર ચોરને મહારાષ્ટ્ર મુમ્બાથી મુદ્દામાલ સાથે પોલીસે ઝડપી પાડયો છે.
વાપી જીઆઈડીસી ગુંજનમાં આવેલ આદર્શ હાઉસીંગ સોસાયટીના ફલેટમાં ગત તા.12 જૂનના રોજ કોઈ ચોર તાળુ તોડી ફલેટમાં ઘૂસી ગયો હતો. સોનાના ઘરેણા અને રોકડા રૂા.1 લાખ ચોરીને ફરાર થઈ ગયો હતો. જેની ફરિયાદ જીઆઈડીસી પોલીસમાં નોંધાયા બાદ એલ.સી.બી.એ તપાસ ચાલું કરી હતી. એલ.સી.બી. પી.આઈ. ઉત્સવ બારોટ અને ટીમે ટેકનિકલ વિશ્લેષણથી ચોરનું પગેરું મેળવ્યું હતું. પોલીસ ટીમ મહારાષ્ટ્ર મુંમ્બા પહોંચી હતી. રીક્ષા ચલાવી તેમજ મજુર બની પોલીસે આકાશ-પાતાળ એક કરીને અંતે પોલીસે આરોપી ચોરને દબોચી લીધો. પણ પૂછપરછ દરમિયાન ઝડપાયેલ આરોપી ચોર રોહીત સોલંકી ઉર્ફે અરહાન સેટ્ટીએ પોલીસ સમક્ષ જે જે કબુલાત કરી હતીતે સાંભળી પોલીસ પણ અચરજમાં પડી ગઈ હતી. મુંમ્બામાં બે કરોડના ફલેટમાં રહેતો હતો. ઓડી જેવી લક્ઝરીયસ કારમાં ફરતો હતો તેમજ ચોરી કરવા અન્ય રાજ્યોમાં ફલાઈટથી જતો આવતો હતો. વાપી સહિત આરોપીએ કુલ 19 ચોરીની કબુલાત પોલીસ સમક્ષ કરી છે. મુદ્દામાલ સાથે પોલીસે આરોપી રોહીત સોલંકીની ધરપકડ કરી વધુ તપાસ માટે જીઆઈડીસી વાપી પોલીસને સોંપ્યો છે.