પોલીસ અને ડેપો મેનેજરની દરમિયાનગીરી બાદ માંડ માંડ મામલો થાળે પડયો
(વર્તમાન પ્રવાહ વાપી બ્યુરો)
વાપી, તા.05: વલસાડ એસ.ટી. બસ ડેપોમાં બુધવારે રાત્રે મુસાફરોએ બસોની અનિયમિતતાને લઈ ઘણા લાંબા સમયથી કંટાળેલા મુસાફરોએ ડેપો ઉપર હલ્લાબોલ કરીને બસોની અવર જવર અટકાવીદઈને ડેપો માથે લીધો હતો. પોલીસ અને ડેપો અધિકારીઓ દોડતા થઈ ગયા હતા.
વલસાડ એસ.ટી. ડેપો ખુબ અગત્યનો બસ ડેપો છે. જિલ્લા ભરના વિદ્યાર્થીઓ, વેપારી, નોકરીયાત તથા સામાન્ય મુસાફરો નિયમિત અપડાઉન કરતા રહે છે. પરંતુ છેલ્લા બે-ત્રણ વર્ષથી ડેપોની કામગીરીમાં લાલીયાવાડી થઈ રહી છે. કલાકે સુધી બસો ડેપોમાંથી ઉપડતી નથી તેથી કંટાળેલા મુસાફરોએ ગત સાંજે ડેપો ઉપર હંગામો મચાવી દીધો હતો. ડેપોમાંથી નિકળતી અન્ય બસોની અવર જવર અટકાવી દેતા મામલો ઉગ્ર બન્યો હતો. ડેપો મેનેજર અને અધિકારીઓ સ્થળ ઉપર રૂબરૂ આવી સમસ્યાનો નિવેડો ના લાવે ત્યાં સુધી બસો ઉપડવા નહીં દઈશું તેવી હઠ અને માંગણી દોહરાવી મુસાફરોએ હલ્લાબોલ મચાવી દીધો હતો. અંતે મામલો વધુ ગંભીર બનતા પોલીસ ડેપો ઉપર દોડી આવી હતી. અધિકારીઓ અને પોલીસની દરમિયાનગીરી બાદ મામલો માંડ માંડ થાળે પડયો હતો.
