(વર્તમાન પ્રવાહ ન્યુઝ નેટવર્ક)
સેલવાસ, તા.06 : સેલવાસ શહીદચોક ચાર રસ્તા નજીક રેલવે બુકીંગ સેન્ટર પર કર્મચારી દ્વારા ગરબડ કરવાની ફરિયાદ સંદર્ભે વિજીલન્સની ટીમે રેડ પાડી એક કર્મચારીને ઝડપી પાડયો હતો.
પ્રાપ્ત વિગત અનુસાર મુંબઈથી વાયા ભિલાડ થઈ વિજીલન્સ ટીમ રિક્ષામાં સેલવાસ પહોંચી હતી. ટીમના ચાર ઓફિસર રેલવે બુકીંગ સેન્ટરમાં દાખલ થઈ ત્યાં ઉપસ્થિત સ્ટાફની તપાસ શરૂ કરેલ જે દરમ્યાન એક કર્મચારીની બેગમાં 4500ની કિંમતની બે ટીકીટ, મોબાઈલ ફોનની ફાઈલથી એક લાખથી વધુ લાઈવ ટીકીટ અને કેસ કાઉન્ટરમાંથી 1200 રૂપિયા મળી આવ્યા હતા. જેથી કર્મચારીને રંગેહાથ ઝડપી પાડવામાં આવ્યો હતો. જેને દાનહ પ્રશાસન દ્વારા નોકરીમાંથી છૂટો કરી દેવામાં આવ્યો હતો. આ કર્મચારી બુકીંગ કાઉન્ટર પર ટિકિટ લેવા માટે લાઈનમાં ઉભા રહેલ ગ્રાહકોપાસેથી ફોર્મ લઈને પહેલા પોતાના લાભના ફોર્મ ઉપર રાખી ટિકિટ રિઝર્વેશન કરી લેતો હતો. જેથી લાઈનમાં ઉભેલા ગ્રાહકોને રિઝર્વેશન ટિકિટ મળી શકતી ન હતી. વિજીલન્સ ટીમની આ રેડથી ટિકિટ દલાલો અને રેલવે ટિકિટ બ્લેક મેલરોમાં ભારે ફફડાટ ફેલાઈ જવા પામ્યો હતો.
