સિવિલ હોસ્પિટલની એક પછી એક વહિવટી ક્ષતિઓ ઉજાગર થઈ રહી છે
(વર્તમાન પ્રવાહ વાપી બ્યુરો)
વાપી, તા.18: વલસાડ સિવિલ હોસ્પિટલ એક પછી એક વિવાદોમાં ઘેરાતી રહી છે. બે દિવસ પહેલાં રેસિડેન્ટ ડોક્ટરોએ દર્દીના સગાએ તબીબને માર મારેલો તેથી હડતાલ પાડી હતી. માંડ માંડ સમાધાન થયું હતું. મહિલા તબીબ સાથે અભદ્ર વર્તનની તપાસ ચાલીરહી છે ત્યારે નવો વધુ એક મામલો પ્રકાશમાં આવ્યો છે. વલસાડ સિવિલ હોસ્પિટલ જાણે કુતરાઓના હવાલે હોય તેવા દ્રશ્યો અનેક વોર્ડમાં ફરી રહેલા કુતરાઓ થકી જોવા મળી રહ્યા છે.
વલસાડ સિવિલ હોસ્પિટલમાં વહીવટી તંત્રના અનેક છીંડા જોવા મળી રહ્યા છે. જેમાં સુરક્ષાનો મામલો પ્રથમ છે. અહીં સારવાર લેવા આવતા દર્દી અને સગા સબંધીઓને જ્યાં ત્યાં રખડતા કુતરાઓનો ડર સતાવી રહ્યો છે. એકવાર છઠ્ઠા માળે કુતરુ પહોંચી ગયું હતું. હોસ્પિટલમાં રખડતા કૂતરા ઘૂસી કેવી રીતે જાય તેવા સવાલો દર્દીઓ તરફથી થઈ રહ્યા છે. ગેટ ઉપર સિક્યોરિટીની કોઈ વ્યવસ્થા નથી. કાલ ઉઠીને રખડતા જાનવરો પણ હોસ્પિટલમાં ઘૂસી શકે છે. સામાન્ય લાગતી આ સમસ્યા ગંભીર છે. મેનેજમેન્ટે નોંધ લેવી રહી.
