(વર્તમાન પ્રવાહ ન્યુઝ નેટવર્ક)
દમણ, તા.03 : કેન્દ્ર શાસિત પ્રદેશ દાદરા નગર હવેલી અને દમણ -દીવ પ્રશાસનના યુવા બાબતો અને રમતગમત વિભાગ દ્વારા કેન્દ્ર શાસિત પ્રદેશમાં પ્રશાસક શ્રી પ્રફુલ પટેલના માર્ગદર્શન હેઠળ યુવા બાબતો અને રમત-ગમત વિભાગના સચિવ ડૉ. અરુણ ટી. અને રમત-ગમત વિભાગના નિયામક ડૉ. શ્રી અરૂણ ગુપ્તા દ્વારા દમણમાં રમત-ગમત સંસ્કળતિના વિકાસ માટે જિલ્લા કક્ષાની આંતરશાળા રમત-ગમત સ્પર્ધાનું આયોજન કરવામાંઆવ્યું છે.
દમણ જિલ્લા આંતર શાળાકીય રમત-ગમત સ્પર્ધામાં વોલીબોલ (અંડર 17 બોયઝ), કબડ્ડી (અંડર 14 અને 17 બોયઝ) અને ખો-ખો (અંડર 14, 17, 19 ગર્લ્સ અને બોયઝ) સ્પર્ધા આજે તા.03/10/2024 થી 10/10/2024 દરમિયાન યોજવામાં આવી રહી છે.
આજે દમણ જિલ્લા આંતર શાળાકીય રમત-ગમત સ્પર્ધામાં અંડર-17 બોયઝ કબડ્ડી સ્પર્ધાનું આયોજન કરવામાં આવ્યું હતું. આ કબડ્ડી સ્પર્ધામાં 19 જેટલી શાળાઓની ટીમોએ ભાગ લીધો હતો. જેમાં સરકારી હાઈસ્કૂલ નાની દમણ પ્રથમ ક્રમે રહી હતી જ્યારે બીજા ક્રમે સરકારી ઉચ્ચ પ્રાથમિક મોડેલ સ્કૂલ અને ત્રીજા ક્રમે સરકારી હાઈસ્કૂલ ભીમપોર રહી હતી.
આ સ્પર્ધામાં શ્રેષ્ઠ પસંદગી પામેલ ખેલાડીઓને વિભાગના અધિકારીઓ દ્વારા ટ્રોફી, મેડલ અને પ્રમાણપત્ર આપીને સન્માનિત કરવામાં આવ્યા હતા.
આ સ્પર્ધામાં વિજેતા ખેલાડીઓ સંઘપ્રદેશ સ્તરીય સ્પર્ધામાં દમણ જિલ્લાનું પ્રતિનિધિત્વ કરશે.
