(વર્તમાન પ્રવાહ ન્યુઝ નેટવર્ક)
સરીગામ, તા. 10
દાદરા નગર હવેલીના સામરવરણી ગ્રામ પંચાયતમાં ‘ગ્રામ પંચાયત વિકાસ યોજના વર્ષ 2022-23’ની કાર્ય યોજના બનાવવા માટે ક્રિકેટ ગ્રાઉન્ડ ખાતે સરપંચશ્રીની અધ્યક્ષતામાં આજે ગ્રામસભાનું આયોજન કરવામા આવ્યું હતું. જેમાં ‘સબકી યોજના, સબકા વિકાસ’ના સૂત્રને અનુલક્ષીને વિવિધ વિકાસના કામો જેવા કે પાણી, રોડ, લાઈટ, ગટર, સ્વચ્છતા, શિક્ષણ, આરોગ્ય, રમત-ગમત તથા રોજગાર જેવા મુખ્ય મુદ્દાના કામોને બહાલી આપવામાં આવી હતી.
આ ઉપરાંત સભામાં કોવિડ-19ને લઈ રસીકરણનો બીજો ડોઝ અને 15 થી 18વર્ષના બાળકો માટે વેક્સિન લેવા માટે ગ્રામજનોને જાગૃત કરવામાં આવ્યા હતા. આ અવસરે સરપંચ શ્રીમતી કૃતિકાબેન અજયભાઈ બારાત, જિલ્લા પંચાયત સભ્ય શ્રી ભગુભાઈ પટેલ, ડીપીઓ, સીડીપીઓ, સમાજ કલ્યાણ વિભાગ, ડીઆરડીએ, આરોગ્ય વિભાગ, વન વિભાગના અધિકારીઓ સહિત મોટી સંખ્યામા ગ્રામજનો ઉપસ્થિત રહ્યા હતા.
