(વર્તમાન પ્રવાહ ન્યુઝ નેટવર્ક)
પારડી, તા.13: છેલ્લા કેટલાક સમયથી સમગ્ર પારડી તાલુકા વિસ્તારમાં કાયદો અને વ્યવસ્થાની સ્થિતિ કથળેલી હોય એવી સ્થિતિ નિર્માણ થયેલી જોવા મળી રહી છે. સામી દિવાળીએ ચોર-તસ્કરો બેફામ બની ચોરી કરી રહ્યા છે જ્યારે બીજી બાજુ પી.આઈ.કક્ષાનું પોલીસ સ્ટેશન આવા ચોરોને ઝબ્બે કરવાને બદલે પારડીને લગોલગ આવેલ કેન્દ્ર શાસીત પ્રદેશમાંથી આવતા સ્થાનિકોને એક કે બે બોટલ લાવનારાઓને પકડી મોટો મીર માર્યો હોય એમ વર્તી રહી છે.
થોડા સમય પહેલા પારડીના ઉમરસાડીના બંગલામાં તથા પારડીના બંધ ફલેટમાંથી રૂા.1.50. લાખની ચોરી થવા પામી હતી. આ ચોરી અંગે પોલીસ કોઈ નક્કર પગલાં ભરી ચોરોને ઝબ્બે કરી શકી નથી ત્યાં ફરી એકવાર પોલીસને પડકાર ફેંકી પારડીના મોટા વાઘછીપા ખાતે આવેલ વિનાયક પેટ્રોલ પમ્પ, પોસ્ટ ઓફીસ તથા એક દરજીની દુકાનમાં ત્રાટકી એક સાથે ત્રણ જેટલી જગ્યાએ સફળતા પૂર્વક ચોરી કરી 60 હજાર જેટલી રકમની ચોરી કરી પલાયન થઈ ગયા હતા. જોકે પેટ્રોલ પમ્પના માલિક પોલીસ સ્ટેશન આવ્યા હોવા છતાં પણ આ ચોરીની પણ હજુ સુધી ફરિયાદ નોંધાઈ નથી.
