આરોપીઓને કોર્ટમાં રજૂ કરાતા ત્રણ દિવસના આપેલા પોલીસ રિમાન્ડ
(વર્તમાન પ્રવાહ ન્યુઝ નેટવર્ક)
સેલવાસ, તા.12 : દાદરા નગર હવેલીના સાયલી ગામે નહેર નજીકથી અજાણી મહિલાની લાશ મળી હતી જેમાં ત્રણ આરોપીઓની ધરપકડ કરવામાં પોલીસને સફળતા મળી છે.
પ્રાપ્ત વિગત અનુસાર ગત તા.03 એપ્રિલ, 2024ના રોજ સાયલી મેઢાપાડા નહેર પાસે પ્લાસ્ટિકની બોરીમાં બાંધેલી હાલતમાં લાશ મળી આવી હતી. જેની ખબરના આધારે પોલીસ અને એફ.એસ.એલ.ની ટીમ ઘટના સ્થળે પહોંચી હતી અને લાશનો કબ્જો લઈ પોસ્ટમોર્ટમ માટે સેલવાસ ખાતે સિવિલ હોસ્પિટલમાં લઈ જવામાં આવી હતી. જેમાં આ લાશ એક મહિલાની હોવાનું જાણવા મળ્યું હતું અને એમનું ગળું દબાવીને હત્યા કરેલ હોવાનું માલૂમ પડયું હતું.
મહિલાની ઓળખ કરતા એમનું નામ સુમિત્રા મગન તુમડા (ઉ.વ.36) રહેવાસી બેડમાળ, વઘઇ-ગુજરાત. આ ઘટના અંગે સાયલી પોલીસ ઇન્ચાર્જ અને ક્રાઇમ બ્રાન્ચની ટીમે ટેક્નિકલ સ્ટાફ દ્વારા તપાસ કરતા (1)પાંડુ ભીખુ વાતાસ (ઉ.વ.29) રહેવાસી ઉમેદભાઈની ચાલ, કરાડ-દાનહ અને મૂળ રહેવાસી તેરી ચીખલી- કપરાડા- ગુજરાત, (2)દિનેશ સીતારામ ડગળા (ઉ.વ.22) રહેવાસીલીલાબેનની ચાલ, કરાડ અને મૂળ રહેવાસી ચેપા, તા.કપરાડા-ગુજરાત, (2)સુનિલ જાનુ પાગી જે હાલ રહેવાસી લીલાબેનની ચાલ કરાડ અને મૂળ રહેવાસી મોટી પલસાણ-કપરાડા-ગુજરાત. ત્રણેય આરોપીઓની દાનહ પોલીસે ધરપકડ કરી કોર્ટમાં રજૂ કરતા તમામ આરોપીઓને બે દિવસના પોલીસ રિમાન્ડ મંજૂર કરાયા હતા. આગળની વધુ તપાસ સાયલી પોલીસ કરી રહી છે.
