લેસ્ટરમાં મૂળ નિવાસી ભારતીયોની સુરક્ષા પ્રદાન કરવા અને પાકિસ્તાન સમર્થિત તોફાનીઓ સામે ઠોસ પગલાં ભરવા દરમિયાનગીરી કરવા રજૂઆત
(વર્તમાન પ્રવાહ ન્યુઝ નેટવર્ક)
દમણ, તા.20: આજે દમણ માછી સમાજ અને દામિની વુમન્સ ફાઉન્ડેશને તાજેતરમાં બ્રિટનના લેસ્ટર શહેરમાં મૂળ નિવાસી ભારતીય તેમાં ખાસ કરીને દમણ-દીવના નાગરિકોને પાકિસ્તાની સમર્થકો દ્વારા કરાઈ રહેલા જાનલેવા હૂમલાના સંદર્ભમાં સંઘપ્રદેશના પ્રશાસક શ્રી પ્રફુલભાઈ પટેલને એક પત્ર પાઠવી ભારત સરકારના વિદેશ મંત્રાલય સાથે વાતચીત કરી મૂળ નિવાસી ભારતીયોને સુરક્ષા પ્રદાન કરવા માટે માંગણી કરી હતી.
દામિની વુમન્સ ફાઉન્ડેશન અને દમણ માછી સમાજના વિશ્વાસ વ્યક્ત કરતા જણાવ્યું છે કે, મોદી સરકાર વિશ્વના કોઈપણ દેશમાં વસતા ભારતીયોની સુરક્ષા માટે પ્રતિબધ્ધ છે. તેથી આ મુદ્દે મોદી સરકાર દ્વારા ઠોસપગલાં ઉઠાવી દમણ-દીવ સહિત મૂળ નિવાસી ભારતીયોની સુરક્ષા માટે યોગ્ય પગલાં ભરવા માંગણી કરીએ છીએ. આ પ્રતિનિધિ મંડળમાં દામિની વુમન્સ ફાઉન્ડેશનના ચેરપર્સન શ્રીમતી સિમ્પલબેન કાટેલા, માછી સમાજ મહિલા વિંગના પ્રમુખ શ્રીમતી નિરૂબેન, ઉપ પ્રમુખ શ્રીમતી નિર્મલાબેન ટંડેલ, માછી સમાજના શ્રી પ્રવિણભાઈ મીઠલા, સમાજના ટ્રસ્ટીઓ સર્વ શ્રી લખમભાઈ ટંડેલ, શ્રી પ્રેમભાઈ ડી. માછી અને શ્રી કાનજીભાઈ ઢાંગરા, શ્રી ચંદ્રગીરી ઈશ્વર, શ્રી અનિલભાઈ ટંડેલ, શ્રી રજનીકાંત ટંડેલ, શ્રી પ્રકાશ ટંડેલ, સહિતના પ્રતિનિધિ મંડળનો સમાવેશ થતો હતો.
