(વર્તમાન પ્રવાહ ન્યુઝ નેટવર્ક)
સેલવાસ,તા.10: દાદરા નગર હવેલીના સામરવરણી ગામમાં ‘સબકી યોજના, સબકા વિકાસ’ના મુદ્દા પર અને ગ્રામ પંચાયતના વિકાસ યોજના જન યોજના સંદર્ભે મુખ્યજિલ્લા અધિકારીશ્રીની અધ્યક્ષતામાં ગ્રામસભાનું આયોજન કરવામાં આવ્યું હતું. જેમાં ગ્રામ પંચાયતના વિકાસના સંદર્ભે વિવિધ યોજનાઓ અને મુદ્દાઓ બાબતે ગહન ચર્ચા-વિચારણા કરવામાં આવી હતી. આ પ્રસંગે સરકારની વિવિધ યોજનાઓ અંગે અલગ અલગ વિભાગના અધિકારીઓ દ્વારા ઉપસ્થિત ગ્રામજનોને જાણકારી આપવામાં આવી હતી. સાથે નાણાંકીય વર્ષ 2023-24ના એક્શન પ્લાન માટે લેવામાં આવનાર કામોની યોજનાઓ અંગે ગ્રામસભામાં ઠરાવની મંજૂરી મેળવી હતી. આ ગ્રામસભામાં ગ્રામજનોની પાંખી હાજરી જોવા મળી હતી. આ અવસરે ડી.પી.ઓ. શ્રી મિથુન રાણા, જિ.પ.સભ્ય, સરપંચ, ડેપ્યુટી સરપંચ સહિત પ્રશાસનના વિવિધ વિભાગના અધિકારીઓ સહિત પંચાયતના સભ્યો અને ગ્રામજનો ઉપસ્થિત રહ્યા હતા.
