(વર્તમાન પ્રવાહ ન્યુઝ નેટવર્ક)
સેલવાસ, તા.18 : દાદરા નગર હવેલીના મસાટ ગામે માલસામાન સાથે પાર્ક કરેલ ટેમ્પોની ચોરીની ઘટનામાં બે આરોપીઓની જિલ્લાની પોલીસે ધરપકડ કરી છે અને આરોપીઓ પાસેથી રૂા.12,03,250ના ટેમ્પો સહિતનો મુદ્દામાલ પણ જપ્ત કરવામાં આવ્યો છે.
પ્રાપ્ત વિગત અનુસાર રામ અવધ તિવારી રહેવાસી-પાતળીયા ફળિયા, સેલવાસ. જેઓનો ટેમ્પો નંબર ડીએન-09 ઈ-9204, જેની અંદાજીત કિંમત રૂા.3,75,000 અને ટેમ્પામાં 7300 કિલો એફ.ડી.આઈ. એસ.ડી. પોલીસ્ટર યાર્ન જેની અંદાજીત કિંમત રૂા.9,28,250 ભરીને ટેમ્પો પરડીપાડા મસાટ ગામે પાર્ક કર્યો હતો. જેની ચોરી થઈ હોવાની ફરિયાદ નોંધાવી હતી. દાનહ પોલીસે અજાણ્યા આરોપીઓ વિરુદ્ધ આઈપીસીની કલમ 379,120(બી) મુજબ ગુનો દાખલ કરી વધુ તપાસ એ.એસ.આઈ. આર.ડી.રોહિતને સોપવામાં આવી હતી. તપાસ દરમ્યાન ટેક્નિકલ અને બાતમીના આધારે આરોપીઓ ઉત્તરપ્રદેશના હોવાની માહિતી મળતા પોલીસની ટીમ પહોંચી આરોપી (1)હિંમત ઉર્ફે રામુ ઠાકુર દાસ સિંહ (ઉ.વ.27) રહેવાસી- જિલ્લો-ઝાંસી, ઉત્તરપ્રદેશ અને (2)બિપિન વિક્રમ મિશ્રા (ઉ.વ.26) રહેવાસી કુશીનગર, ઉત્તરપ્રદેશ જેઓને સેલવાસ લાવ્યા બાદ તેઓની ધરપકડ કરવામાં આવી હતી અને તેઓ પાસેથી ચોરી કરેલ ટેમ્પો અને મુદ્દામાલ જેની અંદાજીત કિંમત રૂા.12,03,250 જપ્ત કરવામાં આવ્યો હતો. આ કેસની વધુ તપાસ સેલવાસ પોલીસ કરી રહી છે.
