(વર્તમાન પ્રવાહ ન્યુઝ નેટવર્ક)
સેલવાસ, તા.02 : સેલવાસ નગર પાલિકા દ્વારા સ્થાવર મિલ્કત માટેજરૂરી ઓક્યુપેન્સી સર્ટીફિકેટ માટે તા.07 અને 08 નવેમ્બરના રોજ સેલવાસ નગરપાલિકા કચેરી ખાતે એક શિબિરનું આયોજન કરવામાં આવ્યું છે. આ સંદર્ભે ન.પા. ચીફ ઓફિસર શ્રી સંગ્રામ શિંદેએ જણાવ્યું છે કે, નગરપાલિકા વિસ્તારમાં ઘણા લોકોના ઓક્યુપેન્સી સર્ટીફિકેટ મેળવવા માટેની અરજીઓ પેન્ડિંગ છે. તેઓની અરજીનો હજુ સુધી કોઈને કોઈ કારણસર નિકાલ નહીં આવ્યો હોય એવી તમામ અરજીઓનો આ શિબિરમાં નિકાલ કરવામાં આવનાર છે. નગરપાલિકા દ્વારા આ સેવા માટે કોઈપણ પ્રકારનો કર લેવામાં આવતો નથી, જો કર લેવામાં આવે છે તો તેની પાકી રસીદ ન.પા. દ્વારા આપવામાં આવે છે અને જો વચેટિયાઓ દ્વારા ઓ.સી. કઢાવી આપવા માટે પૈસાની માંગણી કરવામાં આવે તો આવા લોકો પર પ્રશાસનની નજર છે અને તેમના પર કાનૂની કાર્યવાહી પણ કરવામાં આવશે.
અત્રે ઉલ્લેખનીય છે કે છેલ્લા પાંચ વર્ષથી બિલ્ડરો અને સામાન્ય નાગરિકોને ઓ.સી. મેળવવા માટે ઘણી જ તકલીફો પડતી હતી. હવે નગરપાલિકાના ચીફ ઓફિસર દ્વારા જે સરાહનીય પગલું ભરવામાં આવી રહ્યું છે એ ધન્યવાદને પાત્ર છે.