(વર્તમાન પ્રવાહ ન્યુઝ નેટવર્ક)
સેલવાસ, તા.29 : દાદરા નગર હવેલીના સેલવાસ-નરોલી રોડ પર બોરીગામથી યુવાન પોતાની બાઈક પર સેલવાસ તરફ આવી રહ્યા હતા તે સમયે પાછળથી કન્ટેનરે બાઈકને ટક્કર મારતા યુવાન જોરદાર રીતે નીચે પટકાતા તેનું ઘટના સ્થળ પર જ મોત થતાં ચકચાર મચી જવા પામી હતી.
પ્રાપ્ત માહિતી પ્રમાણે સાહિલ વસંતભાઈ પટેલ (ઉ.વ.27)રહેવાસી બોરીગામ તાલુકો ઉમરગામ. જેઓ પોતાની બાઈક લઈને કોઈ કામસર સેલવાસ તરફ જઈ રહ્યા હતા તે સમયે નરોલી સ્વામિનારાયણ મંદિર પાસે ટર્નિંગ પર પાછળથી પુરઝડપે આવતુ કન્ટેનર નંબર યુપી-21 સીટી-3095ના ચાલકે બાઇકને જોશથી ટક્કર મારી હતી. બાઈક ઉપર સવાર યુવાન બાઈક સાથે નીચે પટકાયો હતોઅને થોડે દૂર સુધી ઢસડાયો હતો, જેના કારણે તેના માથા અને શરીરના ભાગે ગંભીર ઈજાઓ થઇ હતી. ગંભીરરીતે ઈજાગ્રસ્ત બનેલા યુવાનનું ઘટનાસ્થળ પર જ કમકમાટીભર્યું મોત થયું હતું.
આ ઘટના અંગે નરોલી પોલીસને જાણ થતાં પોલીસની ટીમ દોડી આપી હતી અને યુવાનની લાશને એમ્બ્યુલન્સ દ્વારા સેલવાસ સિવિલ હોસ્પિટલમાં લઈ જવામાં આવી હતી. નરોલી પોલીસ દ્વારા કન્ટેનર અને કન્ટેનર ચાલકને પોલીસ સ્ટેશન પર લઈ જઈ ફરિયાદ નોંધી વધુ તપાસ હાથ ધરી છે.