‘‘હવે તમે કોઈ ચિંતા કરતા નહીં તમારો ભાઈ ચૂંટાઈ ગયો છે”: કાર્યકરોને વિજેતા ઉમેદવાર ઉમેશભાઈ પટેલે ચડાવેલો પનારો
(વર્તમાન પ્રવાહ ન્યુઝ નેટવર્ક)
દમણ, તા.04 : દમણ અને દીવ લોકસભા બેઠક ઉપર વિજેતા બનેલા અપક્ષ ઉમેદવાર શ્રી ઉમેશભાઈ પટેલે પત્રકારો સાથે વાતચીત કરતા જણાવ્યું હતું કે, દમણ અને દીવનું હિત તેમની પ્રાથમિકતા રહેશે. તેમણે દમણ અને દીવમાં લોકશાહીની સ્થાપવા કરવાનું તેમનું પ્રથમ કાર્ય હોવાનું જણાવ્યું હતું.
શ્રી ઉમેશભાઈ પટેલે પોતાના કાર્યકરો સાથે સંવાદ કરતા જણાવ્યું હતું કે, તમે કોઈ ચિંતા નહીં કરતા હવે તમારો ભાઈ ચૂંટાઈ ગયો છે અને આપણે જે બોલેલા છે તે કરીને બતાવીશું. હજુ મોટી લડાઈ લડવાની છે. આપણે બધા સાથે મળી દમણ-દીવનું નવું નામ થાય તેવું કામ કરવાનું છે. આપણી પાસે કામ ઘણાં છે અને સમય ઓછો છે. તેથી સમય વેડફવાનો નથી.
